Croeso - Failt erriu

ABOUTPenceunant.jpg

She caffee souyr, caarjoil as neu-vooaralagh ta Penceunant Isaf er lhiargeeyn s’inshley Yr Wyddfa (Snowdon), mysh keead metre dy raad voish Thie-oast Reeoil Victoria, er Cassan Llanberis.

Ta shiu dy kinjagh shickyr dy gheddyn oltaghey creeoil, as caa dy veeiteil rish sleih taitnyssagh er yn un aigney riu. Ta shin shirveish tey as coffee, lhune-ooyl spiceit as feeyn, as shocklaid çheh, as reih lhune ynnydoil. Ta paart dy vee ain agh foddee shiu cur lhiu ny scobbaghyn eu hene stiagh ’sy chaffee dy ghoaill marish y tey eu. Gow-jee tastey – CHA NEE shin yn caffee as yn ynnyd-turryssagh er mullagh y clieau.

SC_View.jpg

Mysh Yr Wydda

She Yr Wyddfa – ‘Snowdon’ ayns Baarle – yn slieau syrjey ayns y Thalloo Vretnagh as eh 1085 dy vetreyn erskyn y cheayn. T’eh grait dy ve yn slieau smoo jingit lesh turryssee ayns Bretin – as my ta shiu rieau er chur shilley er Penceunant Isaf ayns mean y touree bee fys eu dy re shen yn irriney.

She ad shoh ny hard chassanyn - gour y chlag voish Llanberis:

Cassan Llanberis

She shoh yn raad s’lhiurey, agh t’eh coontit dy ve ny sassey na’n chooid elley son nagh vel yn ughtagh ro yeeragh son y chooid smoo.

Cassan Pyg

Ta Cassan Pyg goaill toshiaght ayns pairk-gleashtan Pen-y-Pass as drappal seose harrish Bwlch y Moch (Bollagh ny Muickey) er çheu har Crib Goch.

Cassan ny Meaineyryn

Ta’n fer shoh myrgeddin goaill toshiaght ec pairk-gleashtan Pen-y-Pass as she eh yn raad s’ennoil gys mullagh Yr Wyddfa.

Cassan Watkin

Ta shoh coontit dy ve yn cassan s’doillee seose gys y vullagh.

Cassan Rhyd Ddu

Ta shoh ny cheayrtyn enmyssit Cassan Beddgelert. T’eh goaill toshiaght voish balley beg Rhyd Ddu.

Cassan y Snowdon Ranger

Ta Cassan y Snowdon Ranger goaill toshiaght voish yn A4085, ec oastys sleih aegey er broogh Llyn Cwellyn, er-gerrey da sthap raad-yiarn y Snowdon Ranger.

Snowdon er y Train

Cha nee ynrycan saase dy roshtyn gys mullagh Yr Wyddfa ta Raad-yiarn Slieau Yr Wyddfa – va troggit ayns 1894 –  t’eh tayrn turryssee er e hon hene.

Er Mullagh y Clieau

Va’n chied vuildal er mullagh Yr Wyddfa er ny hroggal ayns 1838. Va stashoon as caffee noa troggit ayns mean ny 1930yn as ad kiaddit liorish Sir Clough Williams-Ellis, fer-croo balley Italianate Portmeirion. Va ynnyd y vuildal shen goit ec buildal Hafod Eryri coodit lesh sclate ta ry akin jiu.

Gow-jee tastey NAGH VEL ny shirveishyn er mullagh Yr Wyddfa foshlit car ny bleeaney, as ta’n caffee beg ec Thie Lieh-Harraaid foshlit ayns yn imbagh as ny cheayrtyn ec y jerrey-shiaghtin çheu-mooie jeh’n imbagh. Ta Thie-tey Penceunant Isaf foshlit 365 laa ’sy vlein.

SC_Rail.jpg

Roshtyn gys shoh

Er y Varroose


Ta shirveish ynnydoil dy varrooseyn voish Llanberis gys Caernarfon, gys Bangor as gys Betws-y-Coed raad Capel Curig. Ta barroose-spaal Sherpa er-lheh ayn ta roie mygeayrt Yr Wyddfa, troggal as lhiggey sheese shooyleyderyn ec toshiaght dagh unnane jeh ny hard chassanyn.

Er y Train

Ta trainyn ard-line reiltagh voish Lunnin, Mean Hostyn as Sheear-hwoaie Hostyn tessen er slyst-marrey Twoaie y Thalloo Vretnagh, gys Bangor as eisht noon gys Ynys Môn (Anglesey), goaill jerrey ayns Caergybi (Holyhead) son y vaatey gys Nerin.

Çheu-mooie jeh Raad-yiarn Slieau Yr Wyddfa ta cur lesh sleih gys mullagh Yr Wyddfa, ta raad-yiarn sloo ayn – Raad-yiarn Logh Llyn Padarn – ta cur lesh shiu voish faggys da Thie-oast Victoria ayns Llanberis noon gys y Thie-tashtee Sclate as eisht mygeayrt Llyn Padarn. Ta’n Raad-yiarn Sleitagh Bretnagh roie voish Caernarfon, sheese gys Beddgelert – lesh sthappyn son paart jeh ny cassanyn er çheu heear Yr Wyddfa – as eisht er e hoshiaght gys Porthmadog, raad oddys shiu goll er boayrd Raad-yiarn Ffestiniog ta cur jerrey er e yurnaa ayns Blaenau Ffestiniog. My nee shiu plannal y chooish dy kiaralagh, foddee shiu jannoo kiarkyl yindyssagh dy hurrys voish Caernarfon gys Porthmadog, seose gys Blaenau Ffestiniog as eisht seose yn ard-line gys Goal Llandudno, as shiu cur jerrey er y chiarkyl lesh barroose back gys Caernarfon.

SC_Ice.jpg

Emshyr

Ta’n emshyr er Yr Wyddfa caghlaa voish mee gy mee, voish laa gy laa, voish oor gy oor as voish minnid gy minnid. My ta shiu karail dy hooyl seose, share diu geddyn faishnys barrantoil ta ry gheddyn er y duillag-eggey shoh voish y Met Office, er-nonney freeinit heose çheu-mooie jeh Caffee Penceunant er y voayrd-naightyn, lesh booise da’n Phairk Ashoonagh as da Shirveish Fysseree Emshyr ny Sleityn.

Cooinee-jee er-lheh dy vod eh ve foddey s’feayrey er y vullagh na heese ’sy valley, as dy negin diu ve aarloo son y chooid smessey.

ICE2.jpg

Sauçhys er y Clieau

She boayl mirrilagh ta sleityn Eryri (Snowdonia) ry-hoi shooyl agh t’eh scanshoil dy ve mie aarlit roish my jed shiu rhymbiu.

Jeeagh-jee dy kinjagh er faishnys yn emshyr – as cur-jee geill da’n raaue dy vel yn emshyr er mullagh ny sleityn caghlaa dy feer tappee.

Edyr shiu dy ve shooyl nyn lomarcan ny marish sleih elley, lhisagh paart dy ghreienyn bunneydagh y ve meriu dy kinjagh – ooilley ry gheddyn dy aashagh ayns shappyn campal mygeayrt ny sleityn.

Ta lane jeh ny cassanyn garroo as ughtagh, myr shen ta piyr mie dy vootsyn feer ymmyrçhagh – lesh shickyrys cha nee carraneyn ny braagyn eddrym.

Smooinee-jee er caslys-çheerey as combaase y choyrt lhiu, cooat as troosyn jeen, eaddagh blah, bee as ushtey.

Ta shiartanse dy eaddeeyn thanney ny share na un eaddagh çhiu. Son walkalyn s’lhiurey, foddee dy bee feme eu er jough heh, feddan, londeyr lesh kishtey-pooar as cruinnag brash, edd olley as lauenyn, er-lheh ’sy yeurey, edd, shelliu-greiney as speckleyryn-greiney.

Shimmey peiagh ta snapperal er thalloo garroo – as ta ram jeh shen er Yr Wyddfa, eer er ny cassanyn sassey – myr shen t’eh ny smooinaght feer vie kit kied chouyr beg y ve eu.

Jean-jee shickyr dy vel shiu oayllagh er y raad – cha nee ynrycan seose y slieau, agh sheese reesht neesht. My hig shiu sheese raad elley jean-jee shickyr dy vel fys eu kys yiow shiu back gys y ghleashtan ny’n thie-oast eu. Ta barrooseyn reiltagh mygeayrt y clieau agh cha vel ad roie ’syn oie.

My oddys shiu, jean-jee ginsh ny plannyn eu da carrey, as cur fys huggey tra vees shiu back.

Ta paart dy ayrnyn jeh ny sleityn raad nagh vel signal çhellvane ry gheddyn – ta meanal dy voddagh GPS ve corragh!

As ny jean-jee jarrood shamraig!